Azərbaycan Respublikasında təşkilati-hüquqi formasından asılı olmayaraq, təşkilatların və fərdi sahibkarların maliyyə-təsərrüfat fəaliyyətində əmtəə-pul dövriyyəsini əks etdirən ilkin uçot sənədlərinin elektron qaydada tətbiqini və uçotunu təmin edən vahid idarəetmə mexanizmdir. Altsistem kağızda çap olunan ciddi hesabat blanklarının rəqəmsallaşdırılmasını, hüquqi qüvvəyə malik sənədlərin elektron imza vasitəsilə təsdiqlənməsini və məlumatların təhlükəsiz şəkildə dövlət informasiya ehtiyatlarında saxlanmasını nəzərdə tutur. Formalaşdırılan bütün elektron sənədlər Azərbaycan Respublikasının qanunvericiliyinə uyğun olaraq dövlətə məxsusdur və onların toplanılması, işlənməsi və mühafizəsi normativ tələblərə əsasən həyata keçirilir.

Altsistemin funksionallığı ciddi hesabat blanklarının identifikasiyası, kateqoriyalara ayrılması, hazırlanması, təsdiqi, verilməsi və uçotu, elektron imza və arxiv mühiti, audit mexanizmləri, məlumat mübadiləsi və dövlət informasiya ehtiyatları ilə inteqrasiya imkanlarını əhatə edir. Bu yanaşma əməliyyatların şəffaflığını təmin edir, insan amilini minimuma endirir və bütün proseslərin izlənilməsini mümkün edir.

Altsistem idarəetmənin mərkəzləşdirilməsi, əməliyyat müddətlərinin optimallaşdırılması, hesabatlılıq və nəzarət imkanlarının genişləndirilməsi, audit dəqiqliyinin artırılması və saxtalaşdırma risklərinin azaldılmasını təmin edir, həmçinin, dövlət qurumlarında sənəd dövriyyəsinin beynəlxalq rəqəmsal idarəetmə standartlarına uyğunlaşdırılmasına və resurslardan səmərəli istifadəyə imkan yaradır.